Sodala, jetz is soweit!!!!! :D

Montag, 26.03.2012

He Leit, schaugts mol auf´n Kalenda!!

Heit is da 26. März 2012, des hoast d Chrisi kommt in zwei Tag wieder huam!! Ka ma des fassen??

6 Monat, also a halbs Jahr is jetz rum!

Mei was soll i sagen! Es hot ja eh a jeder mitkrieagt, dass i de beste Zeit meines Lebens ghabt hob hier!!

I hob auf alle Fälle a zweite Familie hier gfundn und werd se für´n Rest meines Lebens au bhaltnLachend I war mit ganz gewisser Sicherheit hier net zum letzten Mal und werd immer wieder, wenn i raus muaß do her kommen! (S erste Mal scho glei im Mai wiederZwinkernd)

Aber, jetz kommt des große ABERLächelnd I woas dass dahuam au an ganz an Haufn Leit auf mi warten und seit´s versichert I KA`S AU NIMMA DAWARTN BIS I EICH ALLE WIEDER HOB!!

I dank am Herrgott, dass i des in meim Alter doch no auf d Reihe bracht hab, in am anderen Land auf bestimmte Zeit zum Leben und Arbeiten. De Erfahrung ka ma keiner mehr nehmen und s is einfach was ganz was Bsonders!!

Und ma woas danoch einfach no mehra zum schätzen was ma dahuam hot! Ma woas, wo ma highert!

Und i ghör nach Hurlach!! Und i ghör nach Schwabmühlhausen! Do ka ma dra rüttln und schüttln, des is einfach a so!!

I dank EUCH ALLEN, dass a mi während dera Zeit net vergessen habts, mir tonnenweise Briefe, Karten und Packerl gschickt habts und jedsmal wenn auf a Fete "Vo Mellau bis ge Schoppenou" an mi denkt habts!LachendSo an Haufn Briefe!!! :) VIELEN DANK!!

I hob mi über jeden einzelen Besucher gfreit, der si auf´n Weg zu mir hier nach Irland gmacht hat! Es war jedsmol a schene Zeit und was ganz Bsonders!

Ja und sonst? Was gibts sonst no so zum sagn? NIX MEHR!Lachend

Leit, des is da letzte Eintrag in dem Blog do herin. Danke, dass a imma so fleißig glesn habts!!Lächelnd

Und jetzt? Jetzt komm i HEIM!!!!! Was für a Freid!! Was für a große große Freid!

LEIT, I FREI MI AUF EICH ALLE!! JOSI I FREI MI WIE DIE SAU AUF DI!! UND JA MAMI, I FREI MI NATÜRLICH AU AUF DI!!!Lachend

Bis bald

d ChrisiKüssend

Mein Gott!! Bloß no 2 Wochen....

Dienstag, 13.03.2012

... und dann bin i endlich wieder daheim!!Lachend

Unser Internet geht jetzt grad wieder (wiea lang halt, ge...Unentschlossen) und deswegen kann i Eich jetz no gschwind a paar Fotos zeigen!

Aber bitte seits ma net bös, wenn da Eintrag net lang werd, de andern wollen au ins Internet....

Ham jetzt mittlerweile 72! Moggis, de aber Gott sei Dank alle soweit gsund sen! Au die jeweiligen Mami´s gehts guad und mir ham bisher nur 3 oder 4 ghabt mit Milchfieber!D Roisin hot ganz fleißig beim Kälble umtreiben gholfen!!

Sonst gehts alle gut in da Familie und es sen alle gsund und munter!

S Wetter is jetzt teilweise scho so sche, dass ma kurzärmlig drauß rumspringen können! I bin froh, dass d Kinder nachmittag noch da Schual nauskenna! Do kenna si si doch besser austoben!Zwinkernd Und dank da Spülmaschi kann i des auLachend

Letztes Wochenende war i auf meim letzten Trip hier in Irland unterwegs! Noml an d Westküste bin i numdüst. "The Burren", Galway und Connemara!

A Traum!! I sags Eich, da Hammer!!

d "Cliffs of Moher" wollt i anschauen, aber leider hots do an sauber Nebel ghabt: machts nix, s Wasser hob i ghörtLächelnd

Sonst hob i aber echt meega Aussichten ghabt und hob´s einfach nur zum letzten Mal genossen mit meim Titin auf Tour zum sei!

De Ruha und de wilde Schönheit vo dem Landstrich sen einfach atemberaubend! Als wär d Zeit steh blieben! Hob´s genossen, einfach nur genossen!!Lächelnd

Jetzt am Wochenende is ja Paddy´sDay, bin i ja scho gspannt. Im Radio ham´s de Woch bracht, wieso de Iren an dem Tag no mehr saufen, als se eh scho dua! I hob glei grad naus glacht, wo i den Beitrag mitverfolgt habLachend Irgend so a Hamtidamti hot dann angerufen und hot an St.PatricksDay mit´m Oktoberfest bei uns verglichen, "bloß dass die Deutschen dann 2 Wochen lang extrem viel saufen, und wir ja nur einen Tag!".. Wo a recht hot, ge...Cool

Also ihr alle Lieben daheim, bis dann in a paar Tag, werd mi bevor i huam komm scho noml gschwind melden, do herin...

Bis bald

D ChrisiKüssend

Bloß gschwind, zum Bscheid gem..

Mittwoch, 07.03.2012

jetzt komm i halt de Woch doch nimma dazua, dass i Eich a paar Bildle rei dua.. Sorry

Letztes Wochende war i (wieder mol) in Tramore am Strand beim Spazieren gehn, s Wetter war da Hammer und wenn i unsern Hund net dabei ghabt hät, hät i´s au no so richtig genießen können... (Kleine Nervensäge, de ma ins Auto nei gspiebn hotBrüllend)

Außerdem war i mit´m Maikl auf Pub-Tour, in unsere Pubs in und um Skeard und Kilmacow rum... Guad warsLachend, richtig guadCool gsunga hamma und d Kiah ham alleine kälbert....

Sonst is au alls top, mir gehts prima. Und am Wochenende fahr i nach Galway und Connemara (ja Soph, jetz is soweit! Ich werd mich an Deine Pfeilchen und Kreuzerl auf´m Flyer haltenZwinkernd)

Und nächste Woch, so Gott will (und iZwinkernd) gibts dann wirklich wieder an Eintrag mit Fotos und so...

Jetzt wünsch i Eich no a schene Woch, de Philipinen Urlauber an schena Urlaub, passt´s auf Eich auf und kommts wieder guad heim, alle Geburtstagkinder vo dera Woch alles Gute zum Geburtstag (Christl, Schöni, Schmiedl und mei Weibi) (hoff i hob kuan vergessen) lassts Eich gscheid feiern!

Bis nochad dann bald

D ChrisiKüssend

Jessas Maria, jetz werds aber Zeit!!!

Freitag, 02.03.2012

Ja lieber Gott, habts ihr scho mol auf des Datum vo meim letzten Eintrag gschaugt??

Jetz is scho glei an Monat her (der Satz erinnert mi an a ganz ganz schen's LieadZwinkerndKüssend), dass i an letzten Blogeintrag gschriebn hob!!

Aber s hot leider net fruehner klappt!! Und au jetz ka i net wirklich gscheid loslegen, weil unser Internet daheim seit jetz fast scho 2 Wochen nimma geht und i grad in so am InternetCafe herin hock...

Mei gut, es is jetz nix waaahnsinnig Spannendes de letzten Wochen passiert aber de ein oder andere Story kennt i Eich scho ins Kniea drucknZwinkernd Ausserdem britzlts mi ja scho in de Fingerspitzen wieder ebbas zum schreiben!!

 

Ja mei heb, s war doch was Spannendes in letzter Zeit!!

Mei Mami und mei Papi und mei Margit ham si in Flieger ghockt und auf den weiten Weg zu mir gmacht!! Lachend Muttl und Pa, wo no niemals einmal im Flugzeig ghockt sen, ham mein Irlandaufenthalt als Grund gnomma doch a mol in so an grossen Eisenvogel nei zum hocka!Lächelnd Is denn des net sche!!??

Und d Margit ham's als seelische und moralische Unterstuetzung mitgnommenLachend Aber i glaub zwingen ham se Dich net muessen, oder Margit?Zwinkernd

Na Schmarra, es war echt a schen's Wochenende mit Eich drei und i hob mi riessig gfreit, dass a do wards!!

Mir waren wieder am Hook Head, do wo i mit da Mon au scho war, sen viel umanand gfahrn und es is de Herrschaftn net schlecht gwordn, trotz de schlechtn Strassn (naja und meim wunderbaren FahrstilZwinkernd)

Alle ham si gfreit, mol des andere "Eltern"-Paar kennen zum lernen. S war bloss a weng scheisse, dass da Pa kei english ka und da Maikl kua deitsch! Da Maikl und er haettn si furchtbar gern laenger und intensiver unterhalten. Aber i bin ja a so scho kaum mit'm uebersetzen nach kommenZwinkernd

Aber jeder woas jetz, dass Hoftrack -  "little red Loader" hoast und andersch rumLachend Aber dass da Stefan jetz an Fastrack hot, haett ma lieber net verzaehlt!!

Da Maikl will jetz au einLachend

Gott sei Dank ka d Margit (unser kleiner Zistersienser MoenchZwinkernd) englisch, sie hot si ganz locker laessig mit alle unterhalten kenna.

D Mami war ganz besorgt, um den armen Maikl, weil a so an Haufn Arbat hot grad, und hot'n staendig gfrogt, was a jetz denn no alls dua muass, bis a mol Feierabend hot.

Ach ja, Mami au wenn ganz langsam deitsch redest, sie verstehn di trotzdem net!!Zwinkernd

Daet Eich ja gern Fotos zeigen, aber do wart i, bis bei mir dahuam s Internet wieder geht...

Ja und sonst??

Ah ja, de Woch hamma a grosse grosse Hilfe in da Kueche kriegt!!

Da Maikl hot de Woch fuer d Farm so a Blechsilo fuer d Pellets kauft. Und da d Caroline gwis a weng zuendig gwesn waer, wenn se des sieht, hot a si glei was ueberlegt, wie a se a bissl sanftmuetig stimmen kann.

Am gleichen Nachmittag wie des Silo kommen is, is a ind Stadt gfahrn und hot, haltets Euch fest: A SPUELMASCHIN kauft!!!

I hobs ueberhaupts net fassen koennen!!! Ihr koennts Euch gar net vorstellen, wie sche der Sound vo so a Spuelmaschi sei ka!! Des Drum is zwar so laut als daetn 20 Kiah durch d Kich laufn, aber des is ma ja so was vo wurscht!!!Lachend

Noch sage und schreibe 6 (ja wirklich 6!!!) Jahren hot des Haus wieder a funktionsfaehige Spuelmaschine!!!Bis dahin hot da Maikl immer gsagt, mir brauchen keine, mir ham doch d Christina!Zwinkernd Pah, jetz hob i doch a mol Zeit fuer was anders und muass net an halben Nachmittag abspuelen!!

Des is echt so was vo geil!! I frei mi a so!Lachend S braucht net viel um so a Chrisi gluecklich zum machenZwinkernd

Aber soll i Eich no was sang, des geilste Gefuehl, wo i jetz grad mit mir rum trag, is des Gefuehl der Vorfreude!Lächelnd I hob mi ja scho oft auf ebbas gfreit, ge. Aber de Vorfreude, de wo i jetz auf dahuam, auf mei Familie, auf n Josi und auf Eich alle meine Freind und ganz Hurlach, Smh und de ganze Umgebung drum rum hob, de is da Wahnsinn!!Lachend

Jede Friah wach i auf, dreh erstmol a kleins Radl an meim "Tagesrueckzaehler" (danke noml fuer's schickenZwinkerndKüssend) und dann kribblts in meim Bauch wiea als waer i frisch verliebt. Ja guad ok, des bin i au, aber des Verliebt sei und de Vorfreude de wirbln durch mein Bauch wie a Wirbelsturm, der grad vom Himmel auf d Erde aufgschlagn is. Einfach da WAHNSINNLachend

Kennts Eich des vorstellen, dass jetz dann bald a halbs Jahr rum is!! I ka's no gar net wirklich fassen, dass i des wirklich do hob!!

Oh mann, 26 Tage no, dann bin i wieder daheim! Geil, einfach nur sau geil (alle oeffentlichen Behoerden, Kinder usw. wollen meine Ausdrucksweise bitte entschuldigen..!!Zwinkernd)

So, und jetz her i auf. Hock ja doch scho wieder a Stund an dem Karra...

Hoff dass naechste Woch mei Internet wieder geht, dann gibts Fotos.

Bis dahin, bleibts anstaendig

D ChrisiKüssend

 

"Ja freillig kann i Bulldog fahren........"

Samstag, 04.02.2012

Ja, des kann i au! Und ja, i kann au rückwärts fahren! Besonders, wenn kei Wagen hint dort is! Und i kann au rückwärts fahren, wenn so Mischtschieber hint dort is!

Des is a, da kleine "Massey" der si so einfach fahren losst, wie unser führiger Schnuffi (für alle nicht-Wisser: des war unser kleiner Styr-Bulldog) bloß, dass d Kumplung bei dem a bissl arg spät kommt..

Naja, also jedenfalls hob i letzte Woche mit da MamÓ und am Colum (a Nochbar) Stalldienst ghabt, weil meine Leit zum Verwandte besuchen nach England num sen..

Nur da Tadgh is do blieben, bei da MamÓ. Ach ja, und da neie Hund:Is scho a netter Fratz (Jessy heißt se) aber i bin halt net wirklich a "Hunde Person"........

Da Maikl hot ma de Woch davor no grob gsagt, was alls wichtigs zum dua is. Ja und do bin i dann mit dem Misterbulldog au zum fahren kommen... Wie gsagt, es is echt gar net schwer! Und a des Drum hint dort zum bedienen is gar kua Problem, des kann echt da Dümmste!

Aber was au am Dümmsten passieren kann (in dem Fall war i da Dumme!Stirnrunzelnd): Mit dem Mistschieaba am Bulldog über den Mistschieaba am Boden drüber fahren und den dann au no voll gas abreissen!!!....Brüllend Ganz guad gmacht Chrisi, hob i ma denkt!!

Also, bei uns im Stall drüben sen die Laufflächen vo de Kühe nicht überdacht, nur die Liegeflächen. Zwischen de Liegeflächen laufen die automatischen Mistschieber (so wie bei uns im alten Hof herunt, bloß net mit Kette sondern mit a Schiene..)

 Und da wo´s net überdacht is, sen Spaltenböden, wo ma jeden Tag mit dem Räumer an Mist nunterschieben muss.. Und da, genau da laufen die Schienen vo de automatischen Schieber naus.... Auf´m Foto siegt ma´s vielleicht a bissl unter de Füße vo de Kühe... Und auf dem Foto sieht ma au genau meinen "Fahrweg der Zerstörung"Lachend - einfach grad aus zruck, ohne Rüchsicht auf Verluste..... I hob ja de Schieaba gseng! So is ja net! Aber i war ma sicher de halten des aus!! Scheiße wars! Nix wars! Nix ham´s ausghalten!! (Die Kühe, de do auf dem Foto waren, waren bei meim "Crash" net do dort gstandn! De wern unterm Misten immer in d Ställe neigsperrt..Gott sei DankZwinkernd)

Naja gut, Nix is au falsch! S hot ja bloß einer net packt, und es sen schließlich vier...Zwinkernd 

Mir wars jedenfalls voll arg, dass i des Teil abgerissen hab!! Aber au froh, dass ma´s passiert is, wo da Maikl no do war und mir s richten ham können! Wenn ma des passiert wär, wo se furt waren... Lieber Gott, do will i gar net dra denken...

Mir ham´s grad bogen und da Maikl hot´s dann wieder hi gschweißt... Er lofft scho wieder, manchmal muaß man halt a bissl a schiam, aber er geht, Gott sei DankLächelnd

Um en Melkstand rum und bei de hinteren kleinen Liegeflächen muas ma au mit´m Bulldog misten.. Und do is gar net mal so einfach! De Wege do sen sakrisch eng und i hob beim ersten Mol scho a drei, vier Versuche braucht, bis i neikommen bin... Aber es hot alls guad klappt und i hob nix mehr kaputt gmachtLachend Ok, einmal sen d Kiah abghaut ("irgendebba" hot eins vo de gefühlten fünfhundert Gatter net gscheid zuagmacht...) aber mir ham se relativ schnell wieder herin ghabt...Lächelnd 

S Kälber füttern mit´m "großen" Bulldog hot a guad klappt. De wern auf´m Feld drauß gfieattat. Im Frontlader is d Milch in de Kanister drin und s Kälberkorn in de Kiebl.

 De kleinen Moggis sen recht guad zum ham, da hängt da große Milchbehälter am Zaun.Da MamÓ im Matsch....

Aber de großen Kälble kenna scho ganz sche grob wern, wenn de an Bulldog hörn! Do wissn´s genau, dass d Milch kommt.. I hob glei Obacht geben müssen, dass i keins vo dene über´n Haufen fahr und vorallem an Frontlader guad weit nauf fahr, sonst hätten se mir de Michkanister no runter zogen!!!

Aber wie gsagt, s hot prima klapptLachend

I war froh, dass i auf da Farm a bissl was zum tun kriegt hab! I merk scho, dass Zeit werd, dass i wieder a bissl was draus zum arbeiten krieg! Immer bloß im Haus, des macht uan hi... Und bei uns is net so kalt wie bei Eich dahuam grad!! -20°C hot da Pa heit am Telefon gsagt!! (Der hot heit GeburtstagLachend) ...

Ja und sonst? Hm, s lofft alls guad wie bisher.

Allerdings is blöd, dass mei Soph nimma do is! Ham scho a coole Zeit mitnand ghabt und vorallem viel glacht zam!!

Aber mir ham au beide gmerkt, dass de ganzen Schlösser und Burgen, Steinkreise und Dolmen sche langsam "normal" für uns wern.... Am Anfang hamma no jeden einzelnen Steinhaufen fotografiert und jetz? Mei, jetz is zwar scho immer no sche so was zum seng, aber lang nimma so interessant wiea am Anfang!

I werd immer an Hang zu dene Sachen haben! Alte Ruinen und Schlösser wern mi immer anziehen! Aber i merk jetz einfach, dass Zeit werd, dass i wieder heim kommLächelnd 

So wiea´s im September absolut Zeit war, dass i fut geh, so is jetz, in 7 Wochen Zeit, dass i wieder heim komm!

Des schene is, dass i hier mit meiner Familie a zweite Familie gfundn hob! I weiß, dass i immer wieder herkommen kann, so oft wie i will! Vo da Caroline da Onkel hot erst zu mir gsagt: "Ja wenn Du im März nach Deutschland fliegst, dann gehts net wirklich "heim", sondern in URLAUB! Und wenn dann im Mai wieder kommst (do is da Caoimhe ihr Theateraufführung, wo i definitiv wieder herkomm) dann kommst wieder "heim"..."Lachend

Es is auf alle a zweites daheim gwordn! Und do kann i mi echt glücklich schätzen!! Wer hot des scho?! A zweites daheim im Ausland, wo ma mit offene Arme empfangen werd! Und dann au no in so am schönen Land wie Irland!!Lächelnd

So, und wenn i jetzt scho so vo meiner Familie schwärm:

MIR BRAUCHEN A NACHFOLGER(IN) FÜR MICH!!

Also ganz ehrlich und ohne Schmarrn, wer ebban weiß, oder selber gern mal für a paar Monate hier her kommen will zum arbeiten, der soll sich bitte bei mir melden!! Equipeople, die irische Organisation für d "AuPair"-Vermittlung, hot no net wirklich ebban gfundn!

Und es sen halt nur no 9 Wochen, wo i do bin! Wenn ebba Lust hot, und au a         "I muaß jetz fut"-Phase grad hot oder au grad einfach Zeit für so was hot, bitte bitte meldets Euch!!!

So, und jetz weiß i erstmol nix mehr! I wünsch Eich a schönes Wochenende, i werd mi jetz a bissl mit meim Schualzeig beschäftigen und morgen will i, wenn´s Wetter mitspiel, auf´n TorriHill nauf laufen...

Also, bis ganz bald

D ChrisiKüssend

Auf dieser Seite werden lediglich die 5 neuesten Blogeinträge angezeigt. Ältere Einträge können über das Archiv auf der rechten Seite dieses Blogs aufgerufen werden.